Gwamnatin Tarayya Ta Fara Sabon Ƙidayar Yara Marasa Zuwa Makaranta a Najeriya
Abuja – Gwamnatin Tarayya ta sanar da fara gudanar da sabon binciken gidaje a faɗin ƙasar nan domin gano ainihin adadin yaran da ba sa zuwa makaranta, tare da samar da ingantattun bayanan da za su taimaka wajen tsara manufofin bunƙasa ilimi.
Ministan Ilimi, Dakta Tunji Alausa, ne ya bayyana hakan yayin taron shekara-shekara na Ƙungiyar Wakilan Jaridun Ilimi ta Najeriya (ECAN) da aka gudanar a Abuja. Ya ce Ma’aikatar Ilimi ta haɗa gwiwa da Hukumar Ƙididdiga ta Ƙasa (NBS) domin gudanar da binciken, yana mai cewa alkaluman da ake amfani da su a yanzu ba sa nuna ainihin halin da ake ciki.
A cewarsa, gwamnatin tarayya ta samu nasarar mayar da sama da yara miliyan ɗaya makaranta cikin shekaru biyu da suka gabata, amma har yanzu akwai buƙatar sahihan bayanai domin gano inda matsalar ta fi ƙamari da kuma tsara hanyoyin magance ta.
Ministan ya ƙara da cewa gwamnatin Shugaba Bola Ahmed Tinubu na ci gaba da aiwatar da sauye-sauye a fannin ilimi ta hanyar inganta ilimin sana’o’i da fasaha (TVET), kimiyya da fasaha (STEM), amfani da fasahar zamani, inganta tsarin gudanar da ilimi da kuma faɗaɗa damar samun ilimi ga kowane yaro.
Ya kuma bayyana cewa Najeriya ta shafe shekaru uku a jere ba tare da yajin aikin da ya katse karatu a jami’o’i, kwalejojin fasaha da kwalejojin ilimi ba. Haka kuma, ya ce yanzu jami’o’in Najeriya guda 24 ne ke cikin manyan jami’o’i 1,000 na duniya.
Masu ruwa da tsaki a taron sun jaddada muhimmancin haɗin gwiwar gwamnati, iyaye, malamai da kafafen yaɗa labarai domin tabbatar da cewa babu wani yaro da aka bari a baya wajen samun ingantaccen ilimi.
#NexViewTV #FG #Education #OutOfSchoolChildren #Nigeria #Abuja #EducationReform #Tinubu #BreakingNews
Comments
Post a Comment