Tinubu Ya Umarci EFCC Ta Buɗe Asusun Gwamnatin Jihar Osun Cikin Gaggawa

Tinubu Ya Umarci EFCC Ta Buɗe Asusun Gwamnatin Jihar Osun Cikin Gaggawa

Shugaban Najeriya, Bola Ahmed Tinubu, ya umarci Hukumar Yaƙi da Yi Wa Tattalin Arziƙi Zagon Ƙasa (EFCC) da ta gaggauta komawa kotu domin neman a soke umarnin da ya ba ta damar rufe asusun gwamnatin jihar Osun.

A cikin wata sanarwa da ya fitar ranar Alhamis, shugaban ya bayyana cewa matakin da EFCC ta ɗauka ya ba shi kunya, ba saboda hukumar ta aiwatar da aikinta ba, sai dai saboda lokacin da aka ɗauki matakin. Ya ce duk wani abin da hukumomin gwamnatin tarayya suka yi, jama’a kan danganta shi da shugaban ƙasa ko da kuwa bai san da shi ba.

Tinubu ya jaddada cewa tun bayan hawansa mulki ya kauce wa tsoma baki cikin ayyukan EFCC da sauran hukumomin bincike domin su gudanar da aikinsu cikin ’yanci, ba tare da tsoro, son rai ko katsalandan na siyasa ba. Sai dai ya ce har yanzu bai samu cikakken bayani kan dalilin da ya sa aka nemi umarnin kotu na rufe asusun gwamnatin Osun ba.

Shugaban ya ce kasancewar jihar Osun na dab da gudanar da zaɓen gwamna, bai dace a ɗauki wani mataki da zai iya haifar da zargin cewa ana amfani da hukumomin gwamnatin tarayya wajen yin katsalandan a harkokin zaɓe ba. Saboda haka ya umarci EFCC ta gaggauta komawa kotu domin neman a soke umarnin tare da dakatar da duk wani matakin da ta ɗauka kan gwamnatin jihar.

#Tinubu #EFCC #Osun #Najeriya #Zaɓe #Gwamnati #NexviewTV