ASUU-KASU Ta Shirya Tattaunawa Da Gwamnatin Kaduna Don Kaucewa Yajin Aiki

 

ASUU-KASU Ta Shirya Tattaunawa Da Gwamnatin Kaduna Don Kaucewa Yajin Aiki

Umar Nusaiba Ibrahim 

Ƙungiyar Malaman Jami’o’i ta Ƙasa, ASUU, reshen Jami’ar Jihar Kaduna, ta ce a shirye take ta zauna da gwamnatin jihar domin warware matsalolin da ke barazana ga zaman lafiyar aiki a jami’ar. Shugaban ƙungiyar, Dakta Abubakar Abdullahi, ya ce za su gana da gwamnati a kowane lokaci domin nemo mafita.

Ya ce babbar buƙatar ƙungiyar ita ce aiwatar da yarjejeniyar da gwamnatin tarayya da ASUU suka cimma a shekarar 2025, wadda ta shafi walwalar malamai da yanayin aiki a jami’o’i. Ya kuma bayyana cewa daga cikin batutuwa 10 da ƙungiyar ta gabatar a baya, an warware guda uku, yayin da guda bakwai ke nan ba a magance su ba.

Wannan na zuwa ne bayan ASUU-KASU ta bai wa gwamnatin jihar wa’adin makonni biyu domin magance matsalolin, tana mai gargadin cewa rashin daukar mataki na iya haifar da yajin aiki na gaba ɗaya. Ƙungiyar ta kuma nuna damuwa kan batutuwan da suka haɗa da cin gashin kan jami’a, yawan aiki, bashin karin girma, inshorar rayuwa da kuma biyan kuɗaɗen fansho.

Sai dai ASUU-KASU ta ce ba ta son rufe jami’ar saboda sanin illar da hakan zai haifar ga malamai da ɗalibai. A nata ɓangaren, gwamnatin Kaduna ta bayyana aniyarta ta shiga tattaunawa da ƙungiyar domin kaucewa yajin aikin tare da tabbatar da ci gaba da karatun ɗalibai.

Dakta Abdullahi ya buƙaci gwamnatin jihar da sauran masu ruwa da tsaki su yi amfani da wannan dama wajen sake farfaɗo da tattaunawa, yana mai cewa ƙungiyar za ta shiga tattaunawar cikin kyakkyawar niyya. Ya ce warware matsalolin cikin gaggawa zai taimaka wajen dawo da amincewar malamai da kuma hana katsewar harkokin ilimi a jami’ar.

#ASUU #ASUUKASU #KASU #Kaduna #JamiarKaduna #YajinAiki #Ilimi #NigeriaEducation #KadunaState #NexviewTV