NYSC Ta Fitar da Call-Up Letters na Batch B Stream II ga Neja da Sokoto

 

NYSC Ta Fitar da Call-Up Letters na Batch B Stream II ga Neja da Sokoto

Daga Umar Nusaiba Ibrahim 

Hukumar Kula da Masu Yi wa Ƙasa Hidima ta Ƙasa (NYSC) ta fitar da bayanan tura masu yi wa ƙasa hidima na Batch B Stream II na shekarar 2026 zuwa jihohin Neja da Sokoto.

Hukumar ta sanar a shafinta na X a ranar Lahadi cewa matasan da aka tura zuwa jihohin biyu sun samu damar buga wasiƙun kiran aiki (Call-Up Letters).

NYSC ta ce an samu jinkirin fara atisayen horaswa na Batch B Stream II a jihohin Neja da Sokoto sakamakon ayyukan gyaran sansanonin horaswa da ake gudanarwa a halin yanzu.

Bisa sabon jadawalin, za a fara horon orientation a jihohin biyu ranar Laraba, 12 ga Agusta, 2026.

Hukumar ta kuma bayyana cewa za a gudanar da rantsar da masu yi wa ƙasa hidima da kuma bikin tantance iyakar zangon horaswar ranar Juma’a, 14 ga Agusta, yayin da aka tsara gudanar da bikin rufe sansanin ranar Talata, 1 ga Satumba, 2026.

NYSC ta ce gwamnatocin jihohin Neja da Sokoto ne ke gudanar da ayyukan gyaran sansanonin, lamarin da ya tilasta dage fara atisayen horaswar.

Hukumar ta shawarci dukkan masu yi wa ƙasa hidima da aka tura jihohin biyu da su tsara tafiyarsu yadda ya kamata, tare da kauce wa yin balaguro cikin dare domin kare lafiyarsu.

#NYSC #NYSC2026 #BatchB #BatchBStreamII #NYSCNews #CallUpLetter #NYSCDeployment #NigerState #SokotoState #NYSCOrientation #NigeriaYouthService #MasuYiWaKasaHidima