Tinubu Ya Nemi Kotun Amurka Ta Hana Sakin Wasu Takardun FBI Da DEA

 

Tinubu Ya Nemi Kotun Amurka Ta Hana Sakin Wasu Takardun FBI Da DEA

Umar Nusaiba Ibrahim 

Shugaban Ƙasa Bola Ahmed Tinubu ya roƙi wata kotun tarayya a Amurka da ta hana ƙarin sakin wasu bayanan da suka shafi tsoffin binciken da hukumomin FBI da DEA suka gudanar a kansa.

Tinubu, wanda ya shiga shari’ar a matsayin mai ruwa da tsaki, ya shigar da sabuwar takarda a gaban Kotun Gundumar Columbia, inda lauyoyinsa suka ce sakin bayanan zai iya tauye haƙƙinsa na sirri.

Matakin ya biyo bayan ƙarar da Aaron Greenspan, wanda ya kafa PlainSite, ya shigar ƙarƙashin dokar Freedom of Information Act, inda yake neman cikakkun bayanan FBI da suka shafi Tinubu, ciki har da bayanan tambayoyin da aka yi masa tsakanin 1992 da 1993.

Bayanan da ake nema sun shafi wani binciken fataucin hodar Iblis da aka gudanar a Chicago a farkon shekarun 1990. A watan Afrilu 2025, Alƙali Beryl Howell ta umarci FBI da DEA su nemo tare da tantance bayanan da za a iya fitarwa, bayan hukumomin sun kasa tabbatar da ko suna da bayanan da suka shafi Tinubu.

Daga bisani hukumomin sun fitar da dubban shafuka, amma suka rufe wasu sassa na bayanan. Yanzu dai lauyoyin Tinubu suna neman kotun ta amince da ci gaba da wannan rufe bayanan, suna cewa dokar FOIA ba a ƙirƙire ta domin bayyana bayanan sirrin mutane ba.

Lauyoyin sun kuma yi watsi da hujjar cewa ya kamata a saki bayanan saboda Tinubu shugaban Najeriya ne, inda suka ce sha’awar jama’a game da tarihin mutum ko rayuwarsa ba ta isa ta zama hujjar sakin bayanan sirri ƙarƙashin dokar Amurka ba. Tinubu ya daɗe yana musanta aikata wani laifi da ya shafi zarge-zargen.

#Tinubu #FBI #DEA #USCourt #Nigeria #BolaTinubu #FOIA #AaronGreenspan #USPolitics #NigeriaNews #NexviewTV #LabaranDuniya #HausaNews #BreakingNews