Alƙawarin Tinubu Na Rage Kudin Sufuri Ya Fuskanci Kalubale

 

Alƙawarin Tinubu Na Rage Kudin Sufuri Ya Fuskanci Kalubale

Umar Nusaiba Ibrahim 

Kasa da mako guda kafin cikar wa’adin da Shugaban Najeriya Bola Ahmed Tinubu ya sanya na fara rage kudin sufuri a fadin kasar daga ranar 1 ga Oktoba, bincike ya nuna cewa jihohi da dama na iya kasa cika wannan buri saboda karancin tashoshin CNG da wuraren sauya motocin fetur zuwa CNG.

Shugaba Tinubu ya ce gwamnonin jihohi sun amince da daukar matakan rage kudin sufuri ta hanyar amfani da Compressed Natural Gas (CNG) da motocin lantarki. Ya bayyana cewa motocin da ke amfani da CNG na kashe kashi 60 zuwa 80 cikin 100 kasa da kudin da motocin fetur ke kashewa, don haka ya kamata wannan rangwame ya bayyana a farashin sufuri.

Sai dai binciken ya nuna cewa jihohi kamar Taraba, Benue da Plateau ba su da tashar CNG mai aiki ko cibiyar sauya motocin CNG a halin yanzu. Wasu jihohin kuma suna da tashar guda daya kacal, lamarin da ke jawo dogayen layuka da wahalar samun gas. A Borno ma, kudin sauya mota zuwa CNG ya kai akalla naira 650,000, yayin da tashar gas daya ke yi wa Maiduguri da kewaye hidima.

A wasu jihohin kuwa, ana samun kokarin ganin shirin ya yi tasiri. Lagos na da tashoshin CNG da dama tare da cibiyoyin sauya motoci, yayin da Katsina ke hada amfani da CNG, babura ko tricycles masu amfani da wutar lantarki da kuma motocin da ke amfani da tsarin hadaka. Gwamnatocin Benue, Gombe, Adamawa da wasu jihohi sun kuma bayyana cewa suna tattaunawa da masu zuba jari da gwamnatin tarayya domin kara samar da kayayyakin more rayuwa na CNG.

Masana harkokin sufuri sun ce samun tashoshin CNG kadai ba zai wadatar ba, sai gwamnati ta samar da saukin sauya motocin da ke amfani da fetur da dizal zuwa CNG, tare da kara yawan tashoshin cikawa a manyan birane da wuraren da ake yawan zirga-zirga. Sun kuma bukaci a mai da hankali kan manyan motocin dakon abinci, dabbobi da sauran kayayyaki, saboda kudin sufuri na da tasiri kai tsaye kan farashin kayayyaki.

Sai dai Fadar Shugaban Kasa ta ce tuni wasu jihohi suka fara samun raguwar kudin sufuri sakamakon amfani da motocin CNG da na lantarki. Ta bayar da misalan Borno, Kaduna, Oyo, Adamawa, Enugu, Plateau da wasu jihohi, inda ta ce an samu ragin kudin sufuri a wasu hanyoyi. Gwamnatin tarayya ta kuma ce tana ci gaba da aiki tare da jihohi domin ganin an fadada shirin, yayin da wa’adin fara amfani da wannan rangwame a fadin kasar ke gabatowa.

#Tinubu #CNG #TransportFare #Sufuri #Nigeria #CheaperTransport #CNGNigeria #ElectricVehicles #FuelPrice #NigerianEconomy #Transportation #Nigerians #NexViewTV #Arewa #Arewa24 #BBCHausa #ArewaRadio #RFIHausa #DailyTrust