ASUU Ta Ɗauki Sabbin Matakai A Jami’o’in Jihohi

 ASUU Ta Ɗauki Sabbin Matakai A Jami’o’in Jihohi

Umar Nusaiba Ibrahim 

Ƙungiyar Malaman Jami’o’i ta Najeriya, ASUU, ta ayyana yajin aikin sai baba-ta-gani a jami’o’i uku mallakin gwamnatin jihar Lagos, yayin da reshen ƙungiyar a Jami’ar Jihar Taraba ya bai wa gwamnatin jihar wa’adin kwanaki 14 domin magance matsalolin da suka shafi yarjejeniyar da aka cimma a shekarar 2025.

Jami’o’in da yajin aikin ya shafa a Lagos su ne Jami’ar Jihar Lagos, LASU; Jami’ar Ilimi ta Jihar Lagos, LASUED; da Jami’ar Kimiyya da Fasaha ta Jihar Lagos, LASUSTECH. ASUU ta ce matakin ya biyo bayan ƙarewar wa’adin kwanaki 14 da ta bai wa gwamnatin jihar a ranar 31 ga Agusta, ba tare da an cimma matsaya mai gamsarwa kan buƙatunta ba.

Ƙungiyar ta ce babbar buƙatarta ita ce cikakken amincewa da aiwatar da yarjejeniyar da Gwamnatin Tarayya da ASUU suka cimma a watan Disambar 2025 a jami’o’in jihar. Hakan ya haɗa da biyan wasu alawus-alawus da tanade-tanaden jin daɗin malaman jami’a masu aiki da waɗanda suka yi ritaya. ASUU ta ce za ta ci gaba da yajin aikin har sai an samu matsaya mai gamsarwa.

A Jihar Taraba kuwa, reshen ASUU na Jami’ar Jihar Taraba da ke Jalingo ya bai wa gwamnatin jihar wa’adin kwanaki 14, daga 14 zuwa 28 ga Satumba, domin aiwatar da wasu muhimman tanade-tanaden yarjejeniyar Gwamnatin Tarayya da ASUU ta shekarar 2025. Ƙungiyar ta ce idan gwamnati ta kasa amsa buƙatunta bayan wa’adin, za ta ɗauki matakan da doka ta tanada domin kare muradun mambobinta.

Sai dai a Jihar Plateau, ASUU ta dakatar da yajin aikin da ta fara a Jami’ar Jihar Plateau, bayan cimma matsaya da gwamnatin jihar kan buƙatu shida da ƙungiyar ta gabatar. Bayan wani taron gaggawa da aka gudanar a Jos, ƙungiyar ta amince da dakatar da yajin aikin daga tsakar daren 16 ga Satumba, 2026, tare da umartar malaman da su koma gudanar da ayyukan karatu.

#ASUU #ASUUStrike #NigeriaEducation #NigerianUniversities #LASU #LASUED #LASUSTECH #TarabaStateUniversity #PlateauStateUniversity #Education #Students #UniversityEducation #NigeriaNews #Arewa #ArewaNews #Arewa24 #BBCHausa #RFIHausa #ArewaRadio #NexViewTV #NigerianNews #HausaNews #Kano #Nigeria