Diphtheria: Kano Ta Shigar Da Sarakunan Gargajiya Don Ƙara Wayar Da Kan Jama’ar Kano

 

Diphtheria: Kano Ta Shigar Da Sarakunan Gargajiya Don Ƙara Wayar Da Kan Jama’a Kan

Rigakafi

 

Umar Nusaiba Ibrahim 

Hukumar Kula da Cututtuka ta Kano (KNCDC) ta haɗa gwiwa da sarakunan gargajiya a faɗin jihar domin ƙara wayar da kan al’umma game da rigakafin cutar diphtheria da sauran cututtukan da ake iya karewa ta hanyar rigakafi.

Wannan mataki ya biyo bayan bullar cutar diphtheria a wasu al’ummomin ƙaramar hukumar Rano, inda aka samu rahotannin mace-mace sakamakon cutar.

Daraktan Janar na KNCDC, Farfesa Muhammad Adamu Abbas, ya gana da Hakiman gundumomi ƙarƙashin Majalisar Masarautar Kano, inda ya jaddada muhimmancin yin rigakafi tare da neman goyon bayan sarakunan wajen dakile yaɗuwar cutar.

Ya ce yawancin yaran da aka samu da cutar ba su samu cikakkiyar rigakafin yara ba, yayin da wasu suka fara neman magani wajen masu sayar da magunguna ko masu maganin gargajiya, sannan wasu kuma aka kawo su asibiti ne a makare.

Hukumar ta kuma bukaci sarakunan gargajiya da su hana masu maganin gargajiya da wanzamai shiga aikin kula da mutanen da ake zargin suna da diphtheria, tare da tura su cibiyoyin lafiya cikin gaggawa. A nasa bangaren, Dankadan Kano, Dakta Bashir Dankadai, ya tabbatar da cewa sarakunan za su taimaka wajen wayar da kan jama’a, yayin da Ma’aikatar Lafiya ta Tarayya ta tura alluran rigakafi 500,000 da rundunar musamman zuwa Kano da Katsina domin taimakawa wajen dakile barkewar cutar.

#Diphtheria #Kano #KNCDC #Rigakafi #Lafiya #Vaccination #DiphtheriaOutbreak #KanoState #KiwonLafiya #NigerianHealth #HealthAwareness #TraditionalRulers #NCDC #NigerianNews