Gwamna Lawal Ya Naɗa Aminu Atiku Sabon Sarkin Zurmi

 

Gwamna Lawal Ya Naɗa Aminu Atiku Sabon Sarkin Zurmi

Umar Nusaiba Ibrahim 

Gwamnan Jihar Zamfara, Dauda Lawal, ya amince da naɗin Alhaji Aminu Atiku a matsayin sabon Sarkin Zamfaran Zurmi.

Sakataren Gwamnatin Jihar Zamfara, Abubakar Mohammad Nakwada, ne ya sanar da naɗin a ranar Litinin, cikin wata sanarwa da mai taimaka masa kan harkokin yaɗa labarai, Suleiman S/Tudu, ya fitar a Gusau.

Sanarwar ta ce an yi naɗin ne bayan tuntubar juna da kuma shawarwarin masu naɗa sarki na masarautar Zurmi, bisa la’akari da al’adu, daɗaɗɗun al’adun masarautar da kuma dokokin jihar.

Aminu Atiku, wanda kafin naɗin yake riƙe da sarautar Dangaladiman Zurmi, ya zama Sarkin Zamfaran Zurmi na 21, inda ya maye gurbin marigayi Alhaji Bello Suleiman, wanda ya rasu a ranar 31 ga Agusta, 2026. Sabon sarkin shi ne babban ɗan marigayi Alhaji Atiku Abubakar, wanda ya kasance Sarkin Zurmi na 19. Ya kuma taɓa zama Sole Administrator na Ƙaramar Hukumar Zurmi.

Gwamna Dauda Lawal ya taya sabon sarkin murna, tare da roƙonsa da ya gina kan kyakkyawan tarihin magabatansa wajen tabbatar da zaman lafiya, adalci, haɗin kai da walwalar al’ummar masarautar. Ya kuma buƙaci sarkin ya ƙarfafa zaman lafiya da haɗin gwiwa tsakanin al’ummomin masarautar, tare da haɗa kai da gwamnatin jiha da hukumomin tsaro domin inganta tsaro. Gwamnan ya tabbatar wa sabon sarkin cewa gwamnatin jihar za ta ba shi cikakken goyon baya.

#Zamfara #Zurmi #EmirOfZurmi #DaudaLawal #AminuAtiku #SarkinZurmi #ZamfaraState #NexViewTV #Arewa24 #RFIHausa #BBCHausa