NECO 2026: Kano Ta Doke Lagos, Ta Zama Jiha Mafi Kyawun Sakamako

 

NECO 2026: Kano Ta Doke Lagos, Ta Zama Jiha Mafi Kyawun Sakamako

Umar Nusaiba Ibrahim 

Jihar Kano ta zo ta daya a jerin jihohin Najeriya da suka fi samun nasara a jarabawar NECO ta shekarar 2026, inda dalibai 74,413 suka samu aƙalla maki biyar, ciki har da Turanci da Lissafi. Lagos ta zo ta biyu da dalibai 72,496, yayin da Oyo ta zo ta uku da dalibai 55,543.

Wannan nasarar ta sa Kano ta zama ta daya a sakamakon jarabawar NECO na kasa a karo na biyu a jere, bayan da jihar ta samu irin wannan matsayi a shekarar 2025. Hakan na zuwa ne yayin da ake ci gaba da mayar da hankali kan inganta harkar ilimi a jihar.

Gwamnan Kano, Abba Yusuf, ya taya dalibai, malamai, iyaye da sauran masu ruwa da tsaki murnar wannan nasara. A cikin wata sanarwa da mai magana da yawunsa, Sanusi Bature, ya fitar, gwamnan ya ce nasarar da jihar ta samu sau biyu a jere na nuna cewa zuba jari da ake yi a bangaren ilimi na samar da sakamako.

Gwamnan ya ce gwamnatinsa za ta ci gaba da bai wa ilimi muhimmanci ta hanyar kara kasafin kudin ilimi, gyaran makarantu, daukar ma’aikatan koyarwa da horas da su, bayar da tallafin karatu da kuma tallafawa daliban da ba su da karfin biyan kudin karatu. Ya bayyana cewa gwamnatin jihar ta kashe sama da naira biliyan 4.4 a shekarar 2026 wajen daukar nauyin dalibai masu karamin karfi domin rubuta jarabawar kammala sakandare.

A cewar gwamnan, ilimi na daga cikin bangarorin da suka fi samun kaso mai tsoka a kasafin kudin jihar. Ya ce a shekarar 2024, ilimi ya samu kusan kashi 29.95 cikin 100 na kasafin jihar, yayin da aka ware naira biliyan 168.35, wato kashi 31 cikin 100, a kasafin 2025. A shekarar 2026 kuma, an ware naira biliyan 405.35 ga ilimi.

Gwamna Yusuf ya ce zuba jarin ya wuce tallafawa jarabawa, inda ya hada da gyaran azuzuwa, daukar malamai, samar da kayan karatu, kayan makaranta da tallafin karatu. Ya kara da cewa manufar gwamnatin ita ce samar da tsarin ilimi da zai bai wa matasan Kano ilimi da kwarewar da za su amfani wajen ci gaba da karatu, samun ayyukan yi, kirkire-kirkire da shugabanci.

#NECO2026 #NECO #Kano #KanoState #Education #Ilimi #AbbaYusuf #NigerianStudents #Students #AcademicExcellence #EducationInKano #Nigeria #NexViewTV #BBCHausa #Arewa24 #ArewaRadio #RFIHausa #DailyTrust