Shin Kwankwasiyya Za Ta Iya Kawo Wa NDC Nasara a Kano a 2027?

 

Shin Kwankwasiyya Za Ta Iya Kawo Wa NDC Nasara a Kano a 2027?

Umar Nusaiba Ibrahim 

Kwankwasiyya na daga cikin fitattun ƙungiyoyin siyasa da suka taɓa samun karɓuwa sosai a Kano, musamman saboda tasirin tsohon Gwamnan Kano, Sanata Rabiu Musa Kwankwaso. Ƙungiyar da aka fi saninta da jan hula ta zama wata alama ta biyayya, haɗin kai da kuma ƙwazo wajen tunkarar zaɓe. Sai dai a yanzu, tafiyar na fuskantar babban ƙalubale sakamakon sauya sheƙar wasu manyan jiga-jiganta zuwa wasu jam’iyyu, ciki har da Gwamna Abba Kabir Yusuf da wasu sanatoci da ‘yan majalisun tarayya.

A zaɓen 2023, NNPP mai alaƙa da Kwankwasiyya ta samu gagarumar nasara a Kano, inda ta lashe kujerar gwamna, kujerun sanatoci biyu, da kujerun majalisar wakilai 16 daga cikin 24, baya ga rinjayen kujerun majalisar dokokin jihar. Wannan nasara ta nuna irin ƙarfin tsarin Kwankwasiyya na mobilization a matakin ƙasa. Amma tun daga wancan lokaci, wasu daga cikin manyan mutanen da suka taimaka wajen gina wannan tsarin sun fice, lamarin da ya haifar da muhawara kan ko Kwankwaso zai iya maimaita irin wannan gagarumar nasara a 2027.

Wasu masu lura da siyasar Kano na ganin sauya shekar manyan jiga-jigan na iya rage tasirin Kwankwasiyya, musamman ta fuskar tsarin jam’iyya da haɗin gwiwar siyasa. Sai dai magoya bayan Kwankwaso sun yi watsi da wannan ra’ayi, suna cewa ƙarfin Kwankwasiyya bai dogara kacokan kan ‘yan siyasa masu riƙe da mukamai ba, illa dai yana da tushe ne a cikin talakawa da matasa. Masanin siyasa, Farfesa Kamilu Sani Fage, ya ce bai kamata a raina tasirin Kwankwaso a Kano ba, yana mai cewa har yanzu yana da dimbin magoya baya, duk da cewa sauya shekar wasu abokan tafiyarsa ya raunana tsarin ƙungiyar.

Shigar Kwankwaso cikin NDC tare da amincewa da zama mataimakin ɗan takarar shugaban ƙasa, Peter Obi, ya sake buɗe wata sabuwar hanya ga tafiyar Kwankwasiyya a siyasar ƙasa. A zaɓen 2023, Obi ya samu sama da kuri’u miliyan shida, yayin da Kwankwaso ya samu kusan miliyan ɗaya da rabi a matakin ƙasa. Masu goyon bayan haɗin gwiwar na ganin haɗa waɗannan ƙuri’u na iya samar da babbar gasa a 2027, amma masu sukar tafiyar na ganin matsalar ita ce ko Kwankwaso zai iya kai wa NDC cikakkiyar ƙarfin da yake da shi a Kano bayan ficewar wasu daga cikin manyan jiga-jigansa.

Yayin da ake tunkarar zaɓen 2027, babban abin tambaya shi ne ko ruhin Kwankwasiyya da jan hularta har yanzu za su iya tattara miliyoyin magoya baya kamar yadda aka gani a 2023. Tarihin Kwankwaso ya nuna cewa ya sha fuskantar koma baya amma ya sake dawowa da ƙarfi, lamarin da ke sa wasu ke ganin bai kamata a rubuta ƙarshen tafiyarsa ba. Sai dai wannan karon, zai buƙaci sake gina ƙawance, farfaɗo da tsarin jam’iyya da kuma shawo kan tasirin sauya shekar manyan jagororinsa idan yana son Kwankwasiyya ta sake zama babbar barazana ga APC da sauran jam’iyyu a Kano.

#Kwankwasiyya #Kwankwaso #NDC #PeterObi #2027Elections #KanoPolitics #NigeriaPolitics #Kano2027 #NNPP #APC #Zaben2027 #SiyasarKano #NDC2027 #KwankwasiyyaMovement #NigerianPolitics