An Bukaci Najeriya Da Saudiyya Su Dakile Bidiyon ‘Dabi’un Da Ba Su Dace Ba’ Na Mahajjata A Makkah Da Madinah

 

An Bukaci Najeriya Da Saudiyya Su Dakile Bidiyon ‘Dabi’un Da Ba Su Dace Ba’ Na Mahajjata A Makkah Da Madinah

Umar Nusaiba Ibrahim 

Shugaban matasan jam’iyyar PDP na ƙasa, Prince Muhammed Kadade Suleiman, ya yi kira ga hukumomin Najeriya da na Saudiyya da su ƙara sanya ido kan abubuwan da wasu mahajjata ke wallafawa a kafafen sada zumunta daga biranen Makkah da Madinah.

Suleiman ya ce kiran nasa ya biyo bayan yadda wasu ke mayar da tsarkin wuraren ibadar zuwa abin nishaɗi ko hanyar neman shahara a kafafen sada zumunta.

A wani saƙo da ya wallafa a shafinsa na sada zumunta da aka tabbatar, ya buƙaci Ma’aikatar Hajji da Umrah ta Saudiyya da Hukumar Alhazai ta Najeriya (NAHCON) da su kula da bidiyon da suka haɗa da wasa-wasa, izgili, skit ko wasu abubuwan da ba su dace ba, da kuma halayen da ka iya kawo cikas.

Ya kuma buƙaci hukumomin Najeriya da su tattauna da takwarorinsu na Saudiyya, tare da wayar da kan mahajjatan Najeriya kan yadda ya kamata su gudanar da kansu a wuraren ibadar.

Suleiman ya ce idan wasu mutane suka ci gaba da aikata abubuwan da suka saba wa dokokin Saudiyya, ya kamata hukumomin Najeriya su kai rahoton irin waɗannan lamura ga hukumomin Saudiyya da abin ya shafa, ciki har da yin la’akari da matakan da doka ta tanada kan takaita ko hana biza a nan gaba.

Ya ce manufar ita ce kare mutuncin Makkah da Madinah, tare da tabbatar da cewa ’yan Najeriya da ke ziyartar biranen biyu suna gudanar da kansu cikin girmamawa da ladabin da wuraren ibadar suka cancanta.

#Makkah #Madinah #Hajj #Umrah #Pilgrims #NAHCON #SaudiArabia #Nigeria #Islam #HolyCities #Hajj2026 #MakkahMadinah #NigerianPilgrims #BBCHausa #Arewa24 #ArewaRadio #RFIHausa #NexViewTV