Bitar Jaridun Najeriya: APC Ta Haɗa ’Yan Adawa Cikin Yaƙin Neman Wa’adin Tinubu Na Biyu

Bitar Jaridun Najeriya: APC Ta Haɗa ’Yan Adawa Cikin Yaƙin Neman Wa’adin Tinubu Na Biyu

Umar Nusaiba Ibrahim 

A cikin shirinmu na bitar manyan jaridun Najeriya na yau, jaridar Vanguard ta rawaito cewa Fadar Shugaban Ƙasa da jam’iyyar APC mai mulki sun shigar da wasu manyan ’yan adawa da gwamnoni cikin kwamitin yaƙin neman sake zaɓen Shugaba Bola Ahmed Tinubu a shekarar 2027, duk da adawar da wasu ɓangarorin jam’iyyar ke nunawa.

Wata sanarwa da jaridar ta ɗauko ta nuna cewa Asusun Ba da Lamuni na Duniya, IMF, ya bayyana cewa duk da bunƙasar tattalin arzikin Najeriya da kasancewarta ƙasa mai fitar da makamashi zuwa ƙasashen waje, tsadar rayuwa na ci gaba da addabar jama’a, inda da dama ke fuskantar ƙalubalen biyan buƙatun yau da kullum. Haka kuma, kwamitin Majalisar Wakilai mai kula da al’ummomin da ke karɓar baƙuncin ayyukan mai ya ba da shawarar a yi watsi da ƙorafi kan kamfanin Pipeline Infrastructure Nigeria Limited, PINL, saboda masu ƙorafin sun kasa gabatar da hujjojin da za su tabbatar da zarge-zargensu.

A nata ɓangaren, jaridar The Guardian ta rawaito cewa Shugaba Tinubu ya buƙaci ɓangaren shari’a da ya rufe giɓin da wasu masu alaƙa da harkokin siyasa da ƙungiyoyin masu aikata laifuka ke amfani da su wajen jinkirta ko dakile shari’o’in cin hanci da rashawa. Shugaban ya kuma yi kira da a yi gyare-gyare domin ƙarfafa gurfanar da masu aikata laifukan kuɗi da na tattalin arziki a gaban kotu.

Jaridar The Punch kuwa ta bayar da rahoton cewa kwanaki tara bayan haɗarin jirgin saman sojojin Najeriya da ya faru a Igbokoda, ƙaramar hukumar Ilaje ta Jihar Ondo, har yanzu ba a gano tarkacen jirgin da gawarwakin mutum 25 da rahoton ya ce sun rasu ba. Lamarin ya jawo fargabar yiwuwar matsalar lafiya ga al’ummar yankin, musamman saboda ƙamshin da mazauna yankin ke cewa yana ƙara tsananta a wurin haɗarin.

A ƙarshe, jaridar The Nation ta rawaito cewa wasu ’yan siyasa ƙarƙashin ƙungiyar Arewa for Asiwaju, A4A, sun bayyana cewa ayyukan Shugaba Tinubu cikin shekaru uku da suka gabata za su taimaka masa wajen samun gagarumin goyon baya a Arewa a babban zaɓen 2027.

#NewspaperReview #TodayInTheNews #NigerianNewspapers #Vanguard #TheGuardian #ThePunch #TheNation #Tinubu #APC #Zaben2027 #IMF #NigeriaPolitics #NigeriaEconomy #OndoState #NexViewTV #BBCHausa #Arewa24 #ArewaRadio #RFIHausa