Bwala Ya Amince Gyare-Gyaren Tinubu Sun Jefa Wasu ’Yan Najeriya Cikin Talauci

 

Bwala Ya Amince Gyare-Gyaren Tinubu Sun Jefa Wasu ’Yan Najeriya Cikin Talauci

Umar Nusaiba Ibrahim 

Mai ba Shugaban Ƙasa Bola Tinubu shawara kan harkokin sadarwa da manufofi, Daniel Bwala, ya amince cewa wasu daga cikin sauye-sauyen tattalin arzikin da gwamnatin Tinubu ta aiwatar sun jefa ƙarin ’yan Najeriya cikin talauci.

Sai dai Bwala ya ce duk da matsalolin da sauye-sauyen suka haifar, Najeriya ta samu gagarumin ci gaba tun bayan fara aiwatar da su.

Bwala ya bayyana hakan ne a wata hira da gidan talabijin na Channels, yayin da ake ci gaba da muhawara kan tasirin cire tallafin man fetur da kuma sauye-sauyen da suka shafi tsarin musayar kuɗin waje.

Ya ce babu inda ake aiwatar da irin waɗannan sauye-sauyen tattalin arziki ba tare da samun matsin rayuwa ga jama’a ba. A cewarsa, ƙarin mutanen da suka faɗa cikin talauci sakamakon sauye-sauyen abu ne da gwamnati ta amince da shi, amma ya ce tun bayan fara gyare-gyaren zuwa yanzu, an samu ci gaba.

Bwala ya ƙara da cewa ba za a iya duba ƙarin yawan mutanen da ke cikin talauci a ware ba tare da la’akari da sake fasalin tattalin arzikin da gwamnati ta aiwatar ba.

Bankin Duniya ya bayyana cewa sauye-sauyen sun taimaka wajen inganta wasu muhimman alamomin tattalin arzikin Najeriya, ciki har da daidaiton kuɗaɗen ƙasar da kuma yanayin kasafin kuɗi. Sai dai bankin ya yi gargadin cewa wannan ci gaban bai kai ga inganta rayuwar miliyoyin ’yan Najeriya yadda ya kamata ba.

Haka kuma, Asusun Ba-da Lamuni na Duniya, IMF, ya amince da wasu ci gaban da aka samu wajen daidaita tattalin arzikin ƙasar, amma ya ce talauci da matsalar ƙarancin abinci na ci gaba da zama manyan ƙalubale.

Ga gidaje da dama, cire tallafin man fetur da faduwar darajar Naira sun haifar da ƙarin tsadar sufuri, abinci, makamashi da sauran abubuwan buƙatun yau da kullum.

Masana tattalin arziki sun ce yayin da wasu alamomin tattalin arziki ke nuna ci gaba, har yanzu akwai babban ƙalubale wajen tabbatar da cewa wannan ci gaban ya sauya rayuwar talakawan ƙasar.

Gwamnatin Tarayya ta sha nanata cewa sauye-sauyen sun zama wajibi saboda matsalolin kasafin kuɗi da kuma wasu kura-kurai na tsarin tattalin arzikin da ta ce ta gada a shekarar 2023.

Gwamnatin ta kuma ce ƙarin kuɗaɗen shiga da aka samu bayan cire tallafin man fetur na daga cikin abubuwan da suka taimaka wajen ƙara yawan kuɗaɗen da ake rabawa tsakanin Gwamnatin Tarayya da jihohi.

Sai dai gwamnatin ta amince cewa rage talauci na daga cikin manyan ayyukan da har yanzu ba a kammala ba, tare da bayyana shirye-shiryen tallafa wa jama’a, rancen ɗalibai, tallafin noma da kuma tsarin sufuri na CNG a matsayin wasu daga cikin matakan rage wa jama’a raɗaɗin sauye-sauyen.

#DanielBwala #BolaTinubu #Tinubu #Nigeria #NigeriaEconomy #EconomicReforms #Poverty #FuelSubsidy #Naira #FederalGovernment #WorldBank #IMF #Nigerians #EconomicCrisis #BBCHausa #Arewa24 #ArewaRadio #RFIHausa #NexViewTV