Ma’aikatan Gwamnati Sun Fara Yajin Aikin Gargadi Na Kwanaki Uku

 

Ma’aikatan Gwamnati Sun Fara Yajin Aikin Gargadi Na Kwanaki Uku

Umar Nusaiba Ibrahim

Ƙungiyoyin ma’aikatan gwamnati a ƙarƙashin Joint National Public Service Negotiating Council (JNPSNC) sun umarci ma’aikatan gwamnatin tarayya, jihohi da ƙananan hukumomi da su fara yajin aikin gargadi na kwanaki uku, sakamakon abin da suka ce gazawar gwamnati ce wajen magance matsalolin da suke gabatarwa.

Yajin aikin wanda ya fara yau, Juma’a 2 ga Oktoba, zai ci gaba har zuwa Lahadi 4 ga Oktoba, 2026. Matakin ya biyo bayan kiraye-kirayen da ƙungiyar ta yi a baya ga gwamnatin tarayya na ɗaukar matakan rage radadin tsadar rayuwa da ma’aikata da sauran al’umma ke fuskanta.

Daga cikin buƙatun ƙungiyar akwai rage farashin man fetur zuwa Naira 500 kan kowace lita, bayar da tallafin albashi ga ma’aikata, da kuma fara tattaunawa kan sabon mafi ƙarancin albashi na ƙasa gabanin shekarar 2027.

A cikin wata sanarwa mai ɗauke da kwanan wata 1 ga Oktoba, 2026, wadda Sakataren Ƙasa na JNPSNC, Olowoyo Gbenga, ya sanya wa hannu, ƙungiyar ta ce matakin ya zama dole ne saboda ƙara tsanantar matsin tattalin arziki da ma’aikata ke fuskanta. Ta kuma ce gwamnatin tarayya ba ta amsa buƙatun da aka gabatar wa Shugaba Bola Tinubu a wasikar ranar 21 ga Satumba ba.

A gefe guda, Majalisar Ƙwadago ta Najeriya (NLC) ta bayyana goyon bayanta ga buƙatun JNPSNC, inda ta nemi a gaggauta rage farashin man fetur, a samar da tallafin albashi ga ma’aikata a faɗin ƙasar, tare da fara tattaunawa kan sabon mafi ƙarancin albashi. NLC ta ce tsadar abinci, sufuri, haya da kuɗin makaranta na ci gaba da rage wa ma’aikata ƙimar abin da suke samu.

A cikin saƙon ranar samun ’yancin kai da Shugaban NLC, Joe Ajaero, ya fitar, ƙungiyar ta danganta ƙarin tsadar rayuwa da hauhawar farashin man fetur tun bayan cire tallafin man fetur a shekarar 2023. Ta ce hakan ya ƙara tsadar sufuri, wanda daga bisani ke shafar farashin abinci, haya da sauran bukatun yau da kullum.

NLC ta kuma bukaci gwamnatin tarayya da ta aiwatar da yarjejeniyar rage haraji da aka cimma da ƙungiyoyin ƙwadago a shekarar 2023, tare da rage kuɗin tafiyar da gwamnati, ƙara gaskiya wajen kashe kuɗaɗen gwamnati da zuba jari a hanyoyi, asibitoci, makarantu da sauran ababen more rayuwa.

Haka zalika, ƙungiyar ta nuna damuwa kan rashin aikin yi tsakanin matasa da ƙaura zuwa ƙasashen waje, tare da kira ga gwamnati da ta samar da damarmaki ga matasa. Ta kuma danganta matsalar tsaro da talauci, rashin aikin yi da rashin daidaiton rabon damarmaki, tana mai cewa waɗannan matsaloli suna buƙatar mafita mai ɗorewa.

Yayin da ake tunkarar zaɓen 2027, NLC ta jaddada cewa ya kamata ma’aikata su samu damar yanke shawarar siyasa da kansu, tare da yin kira da a guji magudin zaɓe, tsoratar da masu kada ƙuri’a da kalaman da ka iya haddasa rikicin ƙabilanci ko addini. Ta ce za ta yi amfani da Workers’ Charter wajen bayyana matsayinta kan manufofi da ’yan takara a lokacin da ya dace.

#NexViewTV #LabaranNajeriya #NigeriaNews #JNPSNC #NLC #YajinAiki #Ma’aikata #TsadarRayuwa #ManFetur #Albashi #MinimumWage #Arewa #ArewaNews #BBCHausa #DailyTrust