Masu Garkuwa Sun Rage Kuɗin Fansa Ga ’Yan NYSC Zuwa Naira Miliyan 100

 

Masu Garkuwa Sun Rage Kuɗin Fansa Ga ’Yan NYSC Zuwa Naira Miliyan 100

Umar Nusaiba Ibrahim 

Masu garkuwa da mutane sun rage kuɗin fansar ’yan NYSC 20 da aka sace a hanyar Owerri zuwa Onitsha a jihar Imo, daga Naira miliyan 50 zuwa Naira miliyan 5 ga kowane mutum, wanda ya sanya jimillar kuɗin da suke nema daga Naira biliyan ɗaya zuwa Naira miliyan 100. Sai dai iyalan waɗanda aka sace sun bayyana cewa masu garkuwar na ci gaba da dukansu, lamarin da ya ƙara tayar da hankalin iyalansu.

Ɗaya daga cikin iyayen waɗanda aka sace, Alhaja Alimot Akande, ta ce masu garkuwar sun fara cin zarafin waɗanda ke hannunsu tun ranar Juma’a. Ta ce duk da rage kuɗin fansar, iyalan ba su samu kwanciyar hankali ba saboda ’ya’yansu na ci gaba da kasancewa cikin daji. Ta kuma bayyana cewa an kai wa dukkan waɗanda aka sace, maza da mata, duka.

Waɗannan matasa sun kasance suna tafiya ne daga Ibadan zuwa sansanonin horas da ’yan NYSC a jihohin Abia da Akwa Ibom ranar Alhamis, lokacin da wasu ’yan bindiga suka tare motocin bas ɗin da suke ciki a yankin Umunoha, da ke kan hanyar Owerri zuwa Onitsha. Iyayen waɗanda aka sace sun kuma musanta rahotannin cewa jami’an tsaro sun kubutar da mutum 10, suna cewa waɗanda suka tsira sun samu damar tserewa ne zuwa cikin daji.

A halin da ake ciki, jami’an tsaro sun ce suna ci gaba da kokarin kubutar da waɗanda aka sace. Rundunar ’yan sandan jihar Imo ta ce tana gudanar da samame tare da matsowa kusa da inda ake kyautata zaton ana tsare da matasan. Sai dai kwamishinan ’yan sandan jihar, Audu Bosso, ya ce jami’an tsaro sun gano sansanin da ake tsare da su ta amfani da jiragen leƙen asiri marasa matuƙi, amma an yi taka-tsantsan wajen shiga saboda bayanan sirri sun nuna cewa an dasa abubuwan fashewa a yankin.

Lamarin ya jawo kira daga ƙungiyoyin siyasa da wasu masu ruwa da tsaki na ganin ya kamata gwamnati ta gaggauta kubutar da matasan. Wasu daga cikinsu sun kuma nemi a dakatar da shirin NYSC na tsawon shekara guda domin sake fasalin tsarin da kuma ƙarfafa matakan tsaron waɗanda ke aikin yi wa ƙasa hidima. Sai dai wasu sun jaddada cewa NYSC na da muhimmiyar rawa wajen haɗa kan ’yan Najeriya, don haka ya kamata a sake fasalta shi maimakon watsi da shi gaba ɗaya.

Haka zalika, wasu jami’o’i da iyayen waɗanda abin ya shafa sun ci gaba da yin kira ga gwamnati da hukumomin tsaro da su tabbatar da an kuɓutar da dukkan matasan lafiya. Akalla mutum uku daga cikin waɗanda aka sace an ce sun kammala karatu ne a Jami’ar Fasaha ta Ladoke Akintola, inda mahukuntan jami’ar suka nuna damuwa tare da yin kira da a haɗa ƙarfi wajen ceto su. A nata ɓangaren, rundunar ’yan sanda da sojojin jihar Imo sun tabbatar da cewa suna aiki tare domin ganin an kuɓutar da waɗanda aka sace cikin aminci.

#NexViewTV #NYSC #NYSC2026 #Kidnapping #GarkuwaDaMutane #ImoState #NigeriaNews #LabaranNajeriya #Tsaro #Security #ArewaNews #BBCHausa #Arewa24 #ArewaRadio #RFIHausa #DailyTrust